مسجد اقصیٰ کے صحن کے نیچے اسرائیل نے نئی سرنگ کھود ڈالی

(ایجنسیز)
 قبلہ اول کے دفاع اور اس کی تعمیر و مرمت کے ذمہ دار ادارے "اقصیٰ فاؤنڈیشن و ٹرسٹ" انکشاف کیا ہے کہ اسرائیلی حکومت کے محکمہ آثار قدیمہ نے مسجد اقصیٰ کے البراق صحن کے نیچے ایک نئی سرنگ کھود ڈالی ہے جس کے بعد قبلہ اول مزید خطرات میں گھر گیا ہے۔

الاقصیٰ فاؤنڈیشن کی جانب سے جاری ایک بیان میں کہا گیا ہے کہ یہ سرنگ صحن براق کے عین نیچے کھودی گئی ہے جو مسجد اقصیٰ کی مغربی سمت کے باب الخلیل تک  پہنچا دی گئی ہے، جبکہ کھدائیوں کا سلسلہ اب بھی جاری



ہے۔

فاؤنڈیشن کا کہنا ہے کہ اسرائیلی محکمہ آثار قدیمہ نے مسجد اقصیٰ کے جنوبی قصبے سلوان میں زیرزمین کھدائیوں کا ایک جال بچھا دیا ہے جس کے بعد نہ صرف مقامی شہریوں کے مکانات کو سخت خطرات لاحق ہوگئے ہیں بلکہ سرنگوں کے قبلہ اول کی بنیادوں تک پہنچانے سے اس مقدس مقام کو بھی خطرات لاحق ہیں۔

بیان میں کہا گیا ہے کہ مسجد اقصیٰ کے صحن براق میں کی گئی کھدائی کے بعد باب الخلیل کے مقام پر ایک آہنی سیڑھی بھی دیکھی گئی ہے جس کی مدد سے یہود آباد کار سرنگ میں اترتے اور باہر نکلتے رہے ہیں۔